Si Marcingkam

Si Marcingkam enda iakap kalak, kalak bodoh. Ia kesilang ras mamana. Orang tuana lanai lit. Lampas ndube ia tading melumang.

 

Ibas sada wari mamana enda lawes ku perjudin ngersak kuda. Si Marcingkam isuruhna ngarak-ngarak arah pudi.

 

I tengah dalin naktak kampil mamana e. Sinik saja Si Marcingkam amin idahna nge.

Seh i perjudin man belo ate mamana, tapi kampilna lanai lit. E maka sungkunna Marcingkam.

"Kuidah nge ndai Ma, kampilndu naktak, tapi perban la buat nindu, la pang aku muatsa." nina Marcingkam ngaloi.

Erkiteken si e segat ate mamana ia.

 

Wari kepagin berkat ka mama Marcingkam ku perjudin ngersak kuda. Marcingkam bagi biasana erdalin ngarak-ngarak arah pudi.

Sanga si e suruh mamana Marcingkam maba kampil. Janah ipersingeti mamana pe gelah adi lit tah kai naktak arus ibuat si Marcingkam.

 

I tengah dalan naktak kubang kuda mamana. Mis itamaken Marcingkam kubang kuda ndai ku bas kampil mamana, janah ibabana seh ku perjudin. I perjudin ibereken Marcingkam kampil man mamana. Idah mamana kampil ndai enggo dem kubang kuda.

Merawa me mamana nina, " Engkai maka tamakenndu kubang kuda ku bas kampilku?"

"Tapi kai ndabuh buat nindu Mama, e maka sanga kubang kudandu ndabuh mis kubuat, kutama ku bas." nina Marcingkam erjabab.

 

Mamana lanai sahun man belo. Bage gia, ate mamana. Je nari isuruh mamana Marcingkam nambatken kuda. "Marcingkam, to tambatken kuda e, pilihi ingan nambat si meratahna, si mburna kal." nina mamana.

"Uwe ma, banci." nina Marcingkam.

Baba marcingkam me kuda e, janah itambatken i tengah juma kalak si sangana mbur kal pagena. Gedang banna nalina.

 

Dung erjudi, karaben, suruh mamana me Marcingkam ngelegi kuda e. Tapi si empu page enggo tedis nimai janah merawa. Igudamna atena Marcingkam. Tapi mis Marcingkam nuriken maka ia ndai suruh mamana. Dahi empu juma e mama Marcingkam. Merawa tuhu-tuhu ia man mama Marcingkam.

Dungna nungkun mamana. "Marcingkam, kai enggo ibahanndu?"

"Tambatken i bas simeratahna, ibas simburna" nindu Ma, e maka i je kutambatken." nina Marcingkam ngaloi mamana.

 

Lesek kal ate mamana, e maka terpaksa idangdangina page kalak ndai. Je nari mulih me ia ras Marcingkam ku rumah. Rukur me mamana. Lanai bo terpake Marcingkam enda, atena. Ulin me ia idayaken saja ku negeri si ndauh.

 

I bas sada wari reh me kalak si nggit nuku Marcingkam. Tanna duana iiket kempak pudi. Babana me marcingkam ku kuta si ndauh, mentasi kerangen rimbun raya.

 

Tengah dalin rempet terbegi sora belkih lompat.

"Malik ko je, aku pe bagenda nge geluhku. Lanai bo engko terelar." nina Marcingkam.

"Kai ertina cakapmu e Marcingkam?" nina si maba ia.

"Lit mbarenda i jenda kutogeng siding. Enggo me kap rulih. Ulihna belkih." nina Marcingkam.

Adi enggo kin rulih, payokenca ate tuanna, e maka tambatkenna Marcingkam. Tuan e ras temanna kiam ngayaki belkih e. Kepe belkih ndai megegeh kiam. Dungna latih akapna ngayakisa.

 

Sanga si e mentas perlanja sira arah dalan e. Idahna Marcingkam bas batang kayu.

"Engkai maka ko tambat i je Marcingkam?" nungukun perlanja.

"Enda me dah ko nak, suruh mama aku empo, la aku nggit, e maka iukumna aku i jenda seh nggit. Reh pagi mama, adi enggo aku nggit, e maka pulahina. Adi nggit engko empo, tangtangi aku, engko gancihku i jenda. Reh pagi mama enggo nggit aku empo ndai mama, nim e maka mis ko peempona" nina Marcingkam man perlanja.

 

Jadi me Marcingkam pulah, gancihna perlanja enggo teriket. Reh me tuan si nukur Marcingkam. Latih kal akapna. Segat kal atena Marcingkam erkiteken ia enggo ibuali. E maka gara kal atena, buatna perpalu, gudamna seh mate. Mate me perlanja gancih Marcingkam.

Mulihken Marcingkam ku kuta mamana. Sope seh i kuta, guling-gulingna bana ibas bekas api juma kalak, seh mbiring kerina daging ras ayona. Seh ia i kuta kiamen kerina. Akap anak kuta begu Marcingkam enggo reh.

 

"Labo kebiaren teman, aku nge enda, si Marcingkam. Aku enggo reh i bas si mate nari. Mbue kubaba tenah i bas kade-kadendu si enggo mate." nina Marcingkam petenang ukur kalak si ndeheri ia.

"Eh payo tuhu nake. Enda si Marcingka enggo reh i kuta kalak si mate nari." nina ka deba.

"Dage Marcingkam, jumpa kang kam ras anakku i jah?" nina sekalak pernanden.

"Jumpa bibi, lit tenahen pe. Mesera kal akapna i jah. Ingetna rusur bura ras gelangna sinitadingkenna ndube." nina Marcingkam.

 

Enterem me kalak si tek, janah merhat pe jumpa ras anakna, orang tuana, kakana, agina si enggo mate. Erjanji Marcingka mabai kalak enda ku kuta kalak si enggo mate e. Tapi dalan seh serana ku je.

Berkat me Marcingkam ras kerina kalak si merhat jumpa ras keluargana si enggo mate. Mbue baba kalak enda luahna.

 

Babai Marcingkam kalak ndai arah dalin si mesera, janah seh me ku tepi embang. I je enggo leben itambatken Marcingkam ketang.

Cirawis arah ketang e ku teruh, em ngenca dalanna. Barang-barang kalak ndai marcingkam mabasa. Ia si arah pudina.

 

Sanga cirawis kerina ku teruh, tektek Marcingkam ketang ndai. Kalak ndai kerina ndabuh. Erta-ertana jadi sikerajangen Marcingkam.

Marcingkam jadi bayak. Erjabu ia, buatna anak mamana ndube.