Si Rindu Tubuh

E, tubuh me kunu ndube anak nini, dua diberu, sada dilaki. Empat berngi iya, mate nandena, waluh berngi mate bapana. E, tangis me Anak Melumang rusur, nembeh sibas rumah.

 

"Doah-doahken agindu ku ture, langlang kami medem." nina bibina

 

E, doahkenna agina ku ture.

"Ola kam tangis agi, di kam tangis aku pesip kam, di aku tangis, ise ngapul aku?" nina Si Rindu Tubuh

 

E, piah sinik Anak Melumang ndai, latih, latih iakapna tangis. E, tengah berngi simbages me.

 

"Bibi, buka! Agingku ndai enggo sinik." nina Si Rindu Tubuh

 

E, pekulah sibas rumah tunduh.

 

E, tekuak manuk me kunu. Ku ture sibas rumah, ku rumah Anak Melumang ras Si Rindu Tubuh. Seh i rumah tangis ka Anak Melumang.

 

"Ah, rusur nge agindu tangis, embahkenlah kuteruh karang." nina bibina

 

E, langlang lembu kalak ku karang. Iembahkenna ku karang kerbo, kerbo pe la nggit ndedehsa; embahkenna ku pintu lawang, e langlang me kalak ku juma, langlang me lembu luar, langlang me kerbo.

E, nembeh me kemberahen kuta.

"Ombakken agindu ku lau ame!" nina kemberahen kuta

E, tandangina lau mbelin. Seh me iya i pintu-pintu, jumpa ka ras perjudi dodas, perbulang-bulang pasa cinggalung.

"Totokenlah begu nandendu, sebutlah begu bapandu. Di menang aku kari erjudi kuganda cimpa, kuganda galuh, kuganda pola." nina perjudi

Menang perjudi dua tahil, igandana cimpa, iberekenna man Anak Melumang, terkuyam-kuyam Anak Melumang. Igandana pola sicalung, iberekenna man Anak Melumang, tersirup-sirup Anak Melumang. Igandana ka galuh, iberekenna man Anak Melumang, terdilat-dilat Anak Melumang.

 

E, mentas ku rumah kemberahen kuta.

 

"Ola siar-siar embal-embal mbelang e ame, ombakkenlah agindu ku lau." nina kemberahen kuta

 

E, seh me iya i lau, itotokenna ka begu nandena, itotokenna ka begu bapana.

 

"Alokenlah anakndu enda, aku pe lampas legiken nande, la nai lit ingan i kegeluhen." nina Si Rindu Tubuh

 

E, pulahina agina ku lau. E, kalak mombak kahe-kahe, iya mombak kolu-kolu. E, masir me iya ku tapin dilaki. E, nggawang iya ku rumah, nggawang kuteruh karang. E, lit kalak mere babi terdilat-dilat Anak Melumang. E, piah mbelin Anak Melumang, ngasup me iya erdalin-dalin, erdalin-dalin iya ku karang kerbo.

 

"Ingani kerbota ena gai, man aku lebe kurumah." nina anak permakan

 

E, man me anak permakan ku rumah, idahupkenna sengkebabah, isapukenna ku keldungenna. E, lawes ku barung anak permakan, iberekenna man Anak Melumang. E, man me Anak Melumang.

 

E, ngasup me iya kiam-kiam, kiam-kiam iya ku embal-embal.

 

"Iani kerbota ena agi, enta kulegi gadung tutungen." nina permakan

 

E, mentas Anakoda Perlajar.

 

"Asakai ergana kerbota e?" nina Anakoda Perlajar

 

"Aku, ergana pe la kueteh, utang ngembari ngenca ajangku." nina Anak Melumang

 

"Asakai ulindu ngembari?" nina Anakoda Perlajar

 

"Gadung simpenggel nge erpagi-pagi, gadung simpenggel nge rebi-rebi." nina Anak Melumang

 

"Di bage, raslah kita engkahe, e sambar gonjendu, sambar bulangndu, sambar bajundu, sambar cabinndu." nina Anakoda Perlajar

 

E, engkahe Anak Melumang, ibereken Anakoda belanjana dua ratus. Seh empat bulan enggo dat waluh ratus.

 

"E, ras kita sekali nangkeng agi, ngelegi kerbo babanta ngepar." nina Anakoda

 

"Kam me gelah lebe nangkeng kaka. Enggo me kutukur tabung dua, enggo kujarumi baju dua, bereken man turangta i gugung, turangta Si Rindu Tubuh." nina Anak Melumang

 

"Si Rindu Tubuh la kueteh." nina Anakoda

 

"Bagelah nindu pagi i gugung." nina Anak Melumang

 

E, nangkeng me Anakoda Perlajar. Seh i gugung me Anakoda Perlajar, tengahna juma taka-takan. Naka-naka Si Rindu Tubuh, mentas Anakoda Perlajar.

 

"Lawes ku ja nge kam enda mama." nina Si Rindu Tubuh

 

"Ija Si Rindu Tubuh bibi." nina Anakoda Perlajar

 

"Man kadendu Si Rindu Tubuh mama." nina Si Rindu Tubuh

 

"Enda tenah turangna, baju dua, tabung dua." nina Anakoda Perlajar

 

"Ija gundari Anak Melumang mama? Taruhken kal kami ku je, di atendu jadi, enggom gia lang, sada pagi kami mere biangndu, sada kami si ngelegi pola man inemenndu." nina Si Rindu Tubuh

 

"E, sekali nari kami ras nangkeng." nina Anakoda Perlajar

 

"E, di bage kepe kaka, kaka ningku kata kam, dua kam turang dilaki, dua kami turangndu diberu, enda amak dua, enda kampil dua, enda uis dua, ternonggal kam ras Anak Melumang." nina Si Rindu Tubuh

 

E, seh me i jahe Anakoda Perlajar.

 

"Enda tenah turangta, amak dua, kampil dua, uis dua." nina Anakoda Perlajar

 

E, tangis Anak Melumang.

 

"Ras me ita lah nangkeng." nina Anak Melumang

 

E, seh me iya i gugung, ipeempo me Anakoda Perlajar, iempoina Si Rindu Tubuh. E, sindua ndube ku kepultaken, si nguda ku kesunduten, Anak Melumang itengah.

 

E, tande me dua tahun, tubuh me anak nini, anak dilaki ni kepultaken, anak dilaki nge i kesunduten, anak diberu itengah.

 

E, mbelin anak raja i kepultaken.

 

"Si kai gelarku nande?" nina

 

"E, mamandu nggelari kam, bapa. Enta ku tenun lebe cabin mamandu, kutenun sada tudung mamindu, kubayu sada kampil mamandu, kubayu sada kampil mamindu." nina nandena

 

Enggo me dung kampil ibayu, enggo me dung uis itenun. E, dahina mamana ku ketengahen.

 

"Enda sada mama man cabinndu, bereken sada man tudung mami; enda sada man kampilndu, bereken sada man kampil mami." nina anak raja kepultaken

 

"Kutandai pe kam so pe." nina Anak Melumang

 

"Dua kunu nande diberu, sada kam nge ndube dilaki. Bibi singuda ndube ku kesunduten, nande i kepultaken, bapangku Anakoda Perlajar, nandengku Si Rindu Tubuh." nina anak raja kepultaken

 

"Ah, aku nge pinter nggelar kam bapa, enta kutepa lebe pisondu. Gelarndu si Raja Bulan, si Raja Bulan Malela." nina Anak Melumang

 

E, reh me anak raja kesunduten.

 

"Enda sada man cabinndu mama, bereken sada tudung mami; enda sada kampilndu mamama; bereken sada kampil mami." nina anak raja kesunduten

 

"Ah, kutandai pe kam so pe." nina Anak Melumang

 

"Dua kunu ndube nande diberu, sada kam nge dilaki. Bibi sintua ndube ku kepultaken, nande i kesunduten, bapangku Anakoda Perlajar, nandengku Si Rindu Tubuh." nina anak raja kesunduten

 

Tangis Anak Melumang.

 

"Aku nge pinter nggelar kam bapa, kubahan lebe kulcapindu, gelar kulcapi siulung-ulung, rulung-ulung parang mbelin, rulung-ulung anak perana, rulung-ulung sintua-sintua, rulung-ulung singuda-nguda, rulung-ulung danak-danak, gelarndu si Raja Perkulcapi." nina Anak Melumang

 

E, mulih ku kepultaken raja kepultaken, mulih ku kesunduten raja kesunduten.

 

E, mbelin anak raja ketengahen.

 

"Si kai gelarku nande?" nina anak raja ketengahen

 

"Pelajari mbayu ame, ibayu kampil bibindu; ipelajari ertenun ame, itenun uis bengkilandu." nina nandena

 

Enggo dung kampil ibayu, dung uis itenun. E, dahina me bibina ku kepultaken.

 

"Enda sada man tudungndu bibi, bereken sada cabin bengkila; enda sada kampilndu, bereken sada kampil bengkila." nina anak raja ketengahen

 

"Kutandai pe kam so pe ame." nina bibina si ni kepultaken

 

"Ah, dua kam kunu diberu, sada bapangku ndube dilaki, kam i kepultaken, bibi singuda kunu ndube ku kesunduten, bapangku ndube i tengah." nina anak raja ketengahen

 

Tangis Si Rindu Tubuh

 

"Aku nge pinter nggelar kam ame. Ibahan bengkilandu lebe surindu. Gelarndu siberu Dayang; siberu Dayang Minta Raja." nina bibina si ni kepultaken

 

E, pepukulna ras anakna si Raja Bulan, nina.

 

E, tande me empat berngi nina. E, reh me si Raja Perkulcapi i kesunduten nari, raja kesunduten. E, gualna me kulcapi nina, gelar kulcapi siulung-ulung. E rulung-ulung me parang mbelin, rulung-ulung anak perana, rulung-urung tua-tua, rulung-ulung me singuda-nguda, rulung-ulung me danak-danak. Erdesap-deso me dareh si Dayang Minta Raja, e tadingkenna me amak dabuhen, nina, ngikut me iya ku kesunduten.

 

E, seh me i kesunduten, ipepukul ras Raja Perkulcapi.

 

E, seh me waluh berngi, idahi si Raja Bulan guru sibaso, nina.

 

"Kuga denga nge enda perukur guru." nina si Raja Bulan

 

"Ikapuri belo salungsang pitu ngkebabah." nina guru

 

E, suruh guru kuliki mangki-angki ngembahken belo salungsang. E, kabang kuliki mangki-angki, kabang ku kesunduten. Tengah ertenun siberu Dayang i teruh. Erkulik-kulik kuliki i bobona, ndabuh belo pitu ngkebabah ku tenunen e. Erdesap-deso dareh siberu Dayang, itangtangina tenunenna, itadingkenna tenunen i teruh, idahina si Raja Perkulcapi ku rumah. Tengahna man si Raja Perkulcapi i rumah.

 

"Langlangkenlah nakan ena kaka. Eltep kam gelah kuliki si mangki-angki." nina siberu Dayang

 

E, ieltepna kuliki si mangki-angki, salih jadi manuk simbulan, ieltepna erterukna nge, ibenterna erdeherna, lalap la dat manuk simbulan.

 

E, lawes ku juma siberu Dayang. Ku juma iya erbaba kuran, kiranting iya erbaba ndiru, ku lau iya erbaba cuan, ku lesung iya erbaba sekin, kenda ujar-ujar si Raja Bulan iya.

 

"E, lit sada nari kueteh ukur. Laweslah kam kahe, ngelegi turangku si perburu, urang pengeltep si Adu Amang." nina siberu Dayang

 

E, berkat me si Raja Perkulcapi kahe. Seh me iya i kerangen Limbu Raya, jumpa me iya ras urang pengeltep.

 

"Ise nge ena reh kujenda? Di gelgel menci pe langnga enggo nggarah arah teruhku, kuliki pe la kabang arah boboku. Enda reh jukut mbelin man pangan, kena ipuh simate begu, begundu pe ma nai banci ku rumah" nina si Adu Amang

 

"Aku pe mate nge aku nateku, isuruh turangndu aku kujenda, gelah ieltep kam manuk simbulan." nina Raja Perkulcapi

 

E, nangkeng me si Adu Amang ras Raja Perkulcapi. E, seh i gugung iya duana.

 

E, ieltepna manuk simbulan idatas tanduk, ieltepna kena tubina, terkupir-kupir manuk simbulan, engkupirken banga kelesa. E, ieltepna dua kali ni nina, kena takalna, kumuku ngenca manuk simbulan. E, ieltepna telu kali nina, kena kabengna, nggurpas ngenca manuk manuk simbulan. E, ieltepna empat kali, ieltepna kena nahena, ngkaisken banga kelesa, nulpatken nipi sambar nina, nulpatken daging si ngalah, kula si rance, mata si badat, nahe si ngerepat, babah si ngalunggang. Lalap la dat manuk simbulan.

 

E, mulih si Adu Amang. Enggo mulih banga kelesa.

Bersambung ke Si Rindu Tubuh Bagian II