Raja Ketengahen

Erlajar guru Raja Ketengahen, ipantek ka pantangen sendi gading pitu tingkat bilang-bilangen.

E, erlajar guru me iya, ngoge surat idas pantangen.

E, pantek ciger matawari, ku lau anak raja Dibata, naling-naling me iya.
"Keri gia kata kinigurun, kata kinipanden, beluh kita gia nitipken piso tubing, ngarkari nipi sambar, kita ka gia ndia rukun, rukum kalak rubat itengah jabuna, rubati nakan melawen tasak, kai gunana, kai nanamna, di la lit ingan beras ergantang-gantang, di la lit ingan sira erlayap-layap, la lit ingan belo erlambar-lambar, buah mayang erkibul-kibul, gamber kibul-kibul." nina naling-naling

E, tangis anak nini Raja Ketengahen, susur iya idatas nari kuteruh, lawes iya nangkih uruk-uruk gugung Sibolangit, serpang dalin ku Barat, ku Timur, ku Teba, ku Jawi.

Pantek me ciger matawari.

"So pe ka me reh kempungku man ku rumah." nina ninina, Datuk Rubia Gande

Isuruhna karah-karahen lima puluh kurang dua, berkat karah-karahen lima puluh kurang dua, ndapetsa la idas pantangen. Idaramina, jumpa iya idatas uruk gugung Sibolangit, serpang dalin ku Barat, ku Timur, serpang ku Teba, ku Jawi.

"Man kita kurumah, rajangku; enggo nakan isumpitken, enggo pola ikitangken." nina

E, man me iya kurumah. Enggo besur man, besur minem

"Bapa! Kai kal nge lesek atendu? Lampas ndube nakan isumpitken, melawen ipan kam; lampas nge pola i kitangken, melawen inem kam." nina ninina Datuk Rubia Gande

"Kai saja pe nini! Iban ku lau ndube anak raja Dibata, isaling-salingna kal aku idatas pantangen erlajar guru, ngoge surat." nina Raja Ketengahen

"Di eng kepeken bapa, banci nge kupanggil." nina ninina

E, tabaskenna tabas pemanggil. E, reh anak raja Dibata.

"Kai dahin man dahin nini?" nina anak raja Dibata kempak ninina Datuk Rubia Gande

"Kai saja pe ame! Li kam man sungkunen, isaling-saling kam kunu rebih kempungku, iya erlajar guru ngoge pustaka idas pantangen sendi gading pitu tingkat bilang-bilangen." nina Datuk Rubia Gande

"E, tuhu nge kempundu isaling-saling kami nini. Iban tengahna pantek ciger matawari ku lau kami rebih ras kempundu siberu Dayang Tapi Gerege ras siberu Dayang Tapi Gurantan, ningkami naling-naling kempundu: "Ikeriken gia kata kinigurun, ikeriken gia kata kinipanden, beluh kita gia ndia nitipken piso tubing, beluh kita gia ndia ngarkari nipi sambar, kita ka gia ndia rukum, rukum kalak rubat itengah jabuna nakan melawen tasak, kai gunana, kai nanamna, di la lit ingan beras ergantang-gantang, di la lit ingan sira erlayap-layap, la lit ingan belo erlambar-lambar, buah mayang erkibul-kibul, gamber kibul-kibul." bagem ningkami nini, naling-naling kempundu erlajar guru, ngoge surat idatas pantangen." nina anak raja Dibata

"E, kam me gia ame, rukat nakan panganen kempungku, ngkapuri belo pangan kempungku, ngkimbangi amak pedemen kempungku." nina Datuk Rubia Gande

"Nini, di ngukat nakakan, di ngkapuri belo, di ngkimbangi amak man pedemen kempundu Raja Ketengahen, la kap aku meparas, la kap metunggung; meparasna meparas nge aku min tuhu ngelegi pola man inemen kempundu, man si mere biang kempundu, e maka aku meparas, e nge maka aku metunggung." nina anak Raja Dibata

Lawes me anak Raja Dibata, tergelar siberu Pulen Bangsu si erbajuken kajang na kejung, si ruwisken sutera kolam ndumayung, ercincin sarirawang, jari-jarina beru lo kaheken, ipenna bagi buah arum seding, bukna bagi uas riman nguda, rupana bagi matawari senggalah, perdempakenna bagi bintang tala-tumala, kurumna bagi suasa ibendul. E, lawes me iya kudatas, ku inganna.

Tangis anak Raja Ketengangen itadingkenna.

"Ola kam tangis bapa! Ipelajari gelah erlajar guru, ngoge pustaka idatas pantangen pitu tingkat bilang-bilangen, ipelajari gelah erlajar pantas, irapati gelah erlajar pande." nina Datuk Rubia Gande

"Di enggo kam pagi ngasup rukum kalak rubat itengah jabuna, rubati perban nakan melawen tasak, ulin bage pe; enterem nge kempungku, danci kam milihi, kempungku anak raja Dibata ni Purba, kempungku anak raja Dibata Aguni, kempungku anak raja Dibata Daksina, kempungku anak raja Dibata Nariti, kempungku anak raja Dibata Utara, kempungku anak raja Dibata Irisen." nina ka Datuk Rubia Gande

E, i suruh Datuk me karah-karahen lima puluh kurang dua, ngindang-ngindang anak rajanta Tuan ni Aguni.

E, berkat me karah-karahen lima puluh kurang dua ngindang-ngindangi anak rajanta.

Seh me karah-karahen itengah dalin, ibahan anak raja Tuan ni Aguni me kunu ndube meligai wari telu puluh, tertitik desa siwaluh, mamis silima, katika sitelu.

"Aku nande, di kubeligai wari telu puluh, di kutitik desa siwaluh, di ku oge mamis silima, katika sitelu, enam reh temue itengah dalin, man dakanen me nakan pitu garun, man tasakenken me gula pitu bohan, man pepulung me pola pitu terbung." nina anak raja Tuan ni Aguni

E, enggo me tasak nakan, tasak bengkau, pepulung pola. E seh me karah-karahen lima puluh kurang dua i taneh raja Tuan ni Aguni. E, bere man me karah-karahen lima puluh kurang dua.

"Raja kami, kami suruh-suruhen raja kami, suruh-suruhen Datuk Rubia Gande ras Raja Ketengahen, nina Raja Ketengahen: "Metua kal me jenda nande, lanai kesahna nutu page ku lesung, la nai kesahna njujung kuran ku lau, mbelin me impalku, ipupus mama ras mami i taneh raja Tuan ni Aguni", eng maka kami kujenda raja kami." nina karah-karahen

"Mbelin nge tuhu jenda impalna, ipupus kami ras mamina. Aku saja man sungkunen, mamina saja man sungkunen, si danak-danak nge man arihen." nina Raja ni Purba

E, meganjang me matawari, ndarat me anak rajanta ibas peti besi nari. E, kundul me iya, man belo me iya, teridah kumolun kudatas kuteruh sampah belona ibas teldanna, jari-jarina beru la kaheken, rupana bagi matawari senggalah, bukna bagi uas riman nguda, ipenna bagi buah arum seding gantung. Tergelar me iya siberu Dayang Mehuli Katana. Susur me iya idatas nari kuteruh, erdawit ciken icikenkenna, ban sibelinen nahena.

Mulih karah-karahen ku Ketengahen, la nai surung cakap i cakapken. Seh me karah-karahen i taneh Ketengahen.

"Kai berita?" nina Datuk Rubia Gande ras Raja Ketengahen

"Berita kami, raja kami, la nai surung cakap icakapken ban si belinen nahena anak rajanta Tuan ni Aguni sitergelar siberu Dayang Mehuli Katana." nina karah-karahen

E, lawes anak raja Ketengahen nangkih uruk gugung Sibolangit, mentas perlanja telu kalak.

"Silih! Lawes ku ja kam ena?" nina Raja Ketengahen

"Kami lawes kahe, silih!" nina Perlanja

"Kutera nge perkahendu, silih? Di kalake kuidah bage, ngkahe aku nina, ipersanna lanjana, itempina bekalna, ibentingkenna mudalna, ena kahe aku nindu, lanjandu pe kuidah la lit ipersan kam, kubeligai wari telu puluh, kutitik desa waluh, ku oge mamis lima, katika sitelu, amin bekalndu pe la lit itempi kam, mudalndu pe la ibentingken kam." nina Raja Ketengahen

"E, labo lepak kata wari si oge kam e silih, pengidah matandu pe la lepak. Enggo me ndube beras isukati, enggo me ndube mudal ipeserser, enggo me ndube lanja ipeserser, iban mentas ndube anak rajanta Tuan Dibata ni Purba, tergelar siberu Sinar Mata ni Ari, rupana me payo bagi matawari senggalah, perdempakenna bagi bintang tala-tumala, ayona bagi suasa ibendul, jari-jarina bagi beru lo kaheken, ipenna bagi buah arum seding gantung, bukna bagi uas riman nguda. E, erdalin me iya ndube i taehh Purba, iodak-odakenna pengodakna lima puluh kurang dua. E, sumengging ku kawes me kami, sumengging ku kemuhen. E, piah erdalin kami la nai gejapken kami nading bana lanjan si enggo ipeserser ndube, nading bana mudal si enggo ipeserser ndube, nading bana beras si enggo isukati ndube, edi la kin kepe lepak silih kata situri-turiken kam e." nina Perlanja

"Mulih kam ku taneh Purba, aku me pagi ngatur bekalndu, aku ngadang mudalndu, datken pagi jenda lanjandu, baba cincin ku enda sarirawang, dabuhken kam tekari (sitik nari) ku pelabuhen anak raja Tuan ni Purba, tergelar siberu Dayang Sinar Mata ni Ari." nina Raja Ketengahen

E, mulih me perlanja telu kalak ku taneh Purba. E, idabuhkenna cincin sarirawang ku pelabuhen anak raja.

Gelap matawari, erpelabuh me anak raja, italangina tutup pelabuhenna, las rendihawa. Mbiar siberu Dayang Sinar Mata ni Ari, lompat iya ku rumah, idahina nandena kemberahen rajanta Tuan Dibata ni Purba, guru sibaso Bunga mbulu.

"Kuga nge kam e ame? So pe kuakap ndai sahun pelabuhenndu ipelabuhi kam, enggo ka me kam reh ku rumah!" nina nandena

"Mbiar aku ndai nande! Kutalangi ndai tutup pelabuhenku, las rendihawa. E, lompat aku lawes ku rumah, kudahi kam." nina siberu Dayang Sinar Mata ni Ari

"La lit kebiaren ame, i taneh Purba enda. Tatang tendang e, ola pelabuhen la ipelabuhi, ola denggo tombang." nina nandena

E, tatangina me tendang, italangina tutup pelabuhenna. E, las sitengah taneh Purba. E, cekuhna kubas, pahe kenca sendeng cincin sarirawang ibas tuduh-tuduh anak rajanta Tuan Dibata ni Purba, siberu Dayang Mata ni Ari. Em kap tendangnda lawes ku rumah ndahi nandena kemberahen Tuan Dibata ni Purba, guru sibaso Bunga mbulu.

"Enda me kap si ndai nande." nina siberu Dayang Sinar Mata ni Ari

"Di bage kin kepe ame, kubeligai kidah wari telu puluh, kutitik desa waluh, kuoge mamis lima, katika telu-telu. Reh me kap anak raja si langlang kinirajanna, reh me kap pande si langlang kinipandenna, reh me kap guru si langlang kinigurunna." nina nandena

"O nande! Buat kal bangku beras, beras page siarang, narang gerek-gereken la mehuli, beras page sirangsang, nangsangken nipi sambar, nangsangken banga kelesa, ibuat bangku beras, beras page sipande leket, beras page sisampe tuah, maka leket anak dilaki diberu enterem, maka leket kinibayak kinituah mbue." nina Raja Ketengahen man nandena

E, ibuat me beras, isukati pitu tumba, pitu gantang, pitu ncupak, pitu layap, pitu ngkelih, pitu njemput, pitu ngkebuah. E, tutu melumat, isemaken empat berngi, ijadikenna me jadi manuk si cabur bintang, ibahanna me kabengna, engkepasken banga kelesa, ibahanna me nahena, ernaheken sikaiskais, engkaisken nipi sambar, ersilu-siluken piso penabung, ibahanna takalna, ertakalken takal tenggeling. E, ijadikenna kerahungna, erkerahungken si dolok genting, ermataken kandu na saga. E, erberimbingken si bunga-bunga, ertubiken kalakati penjabat keling. E, erbitukaken si tali dunda, erpusuhken jantung galuh sitabar, erateken si pungga dalit, erpeguken si bungke rimbang, erikurken si kepas dingding, engkepasi banga kelesa, engkepasi nipi sambar. E, ibubuh me kesahna. E, jadi manuk-manuk si cabur bintang.

"De tubuh me engko manuk-manuk si cabur intang, kabang me enggko lumayang, kabang lumayang cinep ku lantaren benang pengkiren, tuktukken tubim, gurpasken kabengmu, kaisken nahem!" nina Raja Ketengahen

E, ituktukkenna tubina bagi sora gerantung si lima-lima, igurpaskenna kabengna bagi sora gendang, iembusken sarune, ikaiskenna nahena bagi langkah si telu-telu, ranakken si lima-lima. E, landek kalak i rumah, lit si ngelandekken busan, lit si ngelandekken ukat. E, puas ate kalak landek, itabaskenna tabas pemanggil, mulih manuk ku rumah. Isemaken empat berngi, nulpatken nipi sambar, e jadi manuk si nanggur dawa-dawa.

"E, di tubuh nge engko manuk-manuk si nanggur dawa-dawa, kabang me engko lumayang lumuyung, mulihi ko cinep ku lantaren benang pengkiren." nina Raja Ketengahen

E, kabang me manuk lumayang lumuyung, cinep me ku lantaren benang pengkiren.

"E, tuktukken ka tubim, gurpasken kabengmu, kaisken nahem!" nina ka

E, ituktukkenna tubina, bagi sora gerantung si lima-lima, igurpaskenna kabengna bagi sora gendang iembusken sarune, ikaiskenna nahena bagi langkah si lima-lima ranakken si pitu-pitu. E, landek kalak i rumah, lit ngelandekken capah, lit ngelandekken kudin.

Puas ate kalak landek. E, kabang me manuk lumayang lumuyung, cinep ku tanduk lesung nuktukken tubi nge, nggurpasken kabeng. E, landek me kalak i lesung, lit ngelandekken ndiru, lit ngelandekken lalu.

E puas me ate kalak landek i lesung. Kabang ka me iya ku pintu lawangen, ituktukkenna ka nge tubina bagi gerantung si lima-lima, igurpaskenna ka kabengna bagi sora gendang iembusken sarune. E, landek me kalak, si lawes ku juma ngelandekken cuan, si lawes ku lau ngelandekken kuran.

Puas me ate kalak landek, e kabang me manuk-manuk lumayang lumuyung, kabang ku taneh Purba.

E, cinep me iya i pintu lawang taneh Purba, nuktukken tubina, nggurpasken kabengna. E, landek kalak, si lawes ku juma ngelandekken tenggala, si lawes ngeria ngelandekken kandi-kandi.

E, ndarat me anak rajanta Tuan Dibata ni Purba, tergelar beru Sinar Mata ni Ari.

"Enterem kal me kap jelma taneh Purba enda parang mbelin, anak perana, tua-tua, singuda-nguda, danak-danak. Ise kal ngasup muat manuk-manuk si nanggur dawa-dawa? Bana kal aku la ertukur, nateku." nina siberu Sinar Matani Ari

E, lit me si ngeltep, lit me si menter. Di manuk-manuk si nanggur dawa-dawa bagi sumpamana manuk si ratah bulung-bulung, akin ibenter reh deherna nge, akin ieltep reh teruhna, lalap la dat manuk si nanggur dawa-dawa.

E, mulih anak raja ku rumah, kabang manuk-manuk arah bobona lumayang lumuyung, encinepi tanduk rumah rajanta Tuan Dibata ni Purba.

E, tuktukkenna ka nge tubina, bagi gerantung si lima-lima, igurpaskenna ka kabengna, bagi sora gendang iembusken sarune, ikiaskenna ka nahena bagi langkah si siwah-siwah ranakken sipulusa, maka ersada tendi ku rumah.

E, ndarat me anak rajanta i rumah nari, ibabana bajuna lolo-lolo ku ture, ilandekkenna manuk-manuk si nanggur dawa-dawa nuktukken tubi nggurpasken kabeng.

"Ola ilandekken kam ame, manuk-manuk si nanggur dawa-dawa nuktukken tubi, nggurpasken kabeng, ola kam denggo adon, e me kap si ujar-ujari, e me kap suruh-suruhen guru sibaso." nina Raja sinu Purba

E, kabang manuk-manuk ku Ketengahen. E, tande empat berngi, isuruh Raja Ketengahen laneng erdeteng-deteng arah tengah awang-awang ku taneh Purba.

E, kabang laneng erdeteng-deteng arah tengah awang-awang ku taneh Purba, icinepina ayo raja. Itepis raja laneng si cinep ibas ayona, kabang ku ayo kemberahen, itepis kemberahen laneng si ni ibas ayona, ndabuh pudun empat waluh ku ampunna.

"Pudun kutera ngenda ndia, raja kami? Kutepisken ndai laneng cinep ibas ayoku, ndabuh pudun si empat si waluh ku ampunku!" nina Kemberahen

"E, di bage kepeken, kemberahen, reh me raja si langlang kinirajanna, reh me pande si langlang kinipandenna, reh me guru si langlang kinigurunnna, kemberahen!" nina Raja si nu Purba

Bersambung ke Raja Ketengahen Bagian II