Si Rindu Tubuh (Sambungan)

"E, aku lit sada kueteh ukur. Marilah ku tengah lawit." nina siberu Dayang

E, kabang manuk simbulan arah bobona, icinepina ka kayu si galinggang raja i tengah lawit. E, tuduhkenna awih man si Raja Perkulcapi
.
"Si ni datas ah la kam gia beluh muatsa, si ni teruh beluh kam erkeneng. Tangtang gonjendu, tangtang bajundu, tangtang bulangndu, tangtang bentingndu, kujenda kampilndu ras pisondu. E, tareken awakndu, enta ku tambatken batu perunggu, maka kam lampas seh iteruh." nina siberu Dayang

E, tambatkenna batu perunggu, idabuhkenna kutengah lawit.

E, lawes me ku rumah siberu Dayang Minta Raja.

"Bibi, enda kampil anakndu, pisona ras bulangna, gonjena ras bentingna." nina siberu Dayang

"Ija si Raja Perkulcapi, Dayang?" nina Si Rindu Tubuh

"Anakndu enggo erlajar bibi." nina siberu Dayang

"Ndigan iya reh ku jenda Dayang?" nina Si Rindu Tubuh

"Ngerabi kita lebe bibi." nina siberu Dayang

"Enggo me dung juma irabi beru!" nina Si Rindu Tubuh

"Di enggo irabi, itabahi, di enggo itabah ierdah, di enggo ierdah isuluh, di enggo isuluh iangkut, di enggo iangkut ilingke, di enggo ilingke ierdangi." nina siberu Dayang

"Enggo menda dung juma erdangen beru." nina bibina

"E, suan suan-suanen, isuan galuh, isuan tebu, isuan belo, isuan mayang, isuang bunga-bunga, isuan rimo." nina siberu Dayang

"Enggo cukup suan-suanen, beru." nina bibina

E, metua me page, erbuah me galuh, gedang tebu, erbunga bunga-bunga, erbunga mayang, erbulung belo, erbuah rimo.

"E, di enggo bage bi, itutu cimpa, ipetasak galuh, iperes tebu, inangkih mayang, inangkih rimo, inangkih belo, ibuat bunga-bunga" nina siberu Dayang

"Enggo me pulung kerina, beru!" nina bibina

"E, ikanting gantang mbaru ku lau bibi." nina siberu Dayang

"E, enggo menda kita reh i lau nari, Dayang. Katawari reh si Raja Perkulcapi?" nina bibina

"Enta ku tenahken lebe kucing ras tempulak." nina siberu Dayang

"Aku perlandekna." nina kucing ras tempulak

"E, aku malu gendang." nina katak

"Aku narune." nina gajah

"Aku malu penganak." nina ampuk

"Aku malu gung." nina tungtung kerangen

"E, aku ndewalkensa." nina pune

"Aku guruna." nina kuliki

E, erkulik-kulik kuliki si mangki-angki. E, tangis tersembep kuliki si mangki-angki

"Enda me kap anakndu ndube bibi." nina siberu Dayang nandangi bibina

"Enggo kepe mate si Raja Perkulcapi, Dayang. E, ku bunuh engko maka ateku malem." nina bibina

"Aku pe mate nge aku nateku bibi. Enda tenahku ermanat-manat, padanta enda ermake." nina siberu Dayang

1. "Di lit pagi danak-danak nisengget, igiling-gilingken taneh sipuluh kali, iampeke ku kalimbubuna, isebut nini beraspati taneh. Sai me utang, gancih ido; sai mara, ku rumah tendi."
2. "Beliden sitik pagi burawanna, bibi, ikicik-kicikken beras sigantang, belo cawir ras baja minak, bunga-bunga sintangke, ioge padi-padina, sai mara tan si kawes, ku rumah tendi arah kemuhen, idewal-dewalken guru si baso; sai utangna, gancih idona; sai marana, kurumah tendina. Gamber timbako silekanna ras guruna."
3. "Beliden pagi sitik burawanna, rembang buen tiga rupa, recibal rudang, ampar-ampar gana tonggal pagi, buaten ertukuk-tukuk, ertangkal-tangkal, ermanuk piak-piak, ertambe-tambe, beras situmba pukulen guruna, sira sincupak persilekana. Sai me utangna, gancih me idona, sai marana, ku rumah tendina."
4. "Beliden sitik pagi burawanna, em mbun-mbun sangkep erpulung, persilih-silihi cur-cur, pola binerkat, galuh binerkat, siang-siang si rungkas, siang tungkas banga kelesa. Sipukulen guruna telu tumba beras, sira sigantang persilekana. Sai utangna, gancih idona; sai mara, ku rumah tendi."
5. "Beliden sitik pagi burawan, e erpantar-pantar, eranjap-anjap, erbertuk empat, erlambe sarsar, narsarken banga kelesa, ermanuk mbulan, ertualah mumbang, ercimpa rambe-rambe, ergule-gulen, gana duwa, pagi buaten ercibal rudang mehalep (rudang mayang), ertukuk-tukuk, ertambe-tambe, ermanuk piak, ertangkal, persilih-silih cur-cur, pola binerkat, galuh binerkat, beski tinampul silando ngawan, siang-siang si rungkas, tungkas nipi sambar, tungkas banga kelesa, icukupi, peraleng tendi ku rumah, nini begu deleng, iogena mayang tandan-tandanen, iogena tualah mumbang surega, iogena cimpa lepat-lepaten, iogena tinaruh manuk raja mulia, ikan i kelayar nari, sira i keriahen nari, ilayari tendi si enggo burawan, meriah ate tendi i rumah. Si matana kurungen manik, gelarna terus sikat ilayari tendi enggo burawan, pekurung-kurung tendi rumah, kampilna kampil sinendi; belona susun-susunen, ersusun tendi ku rumah; taganna tagan kinukut, kalakatina penjabat, kapurna meciho, meciho perlaban perulihen, ijabat, ikukut tendi si mehuli i rumah. E, sai me utang, gancih ido. E, silekanna situmba sira, pukulen guruna lima tumba beras, amak silambar, dagangen sada; utangna empat emas, sulpat me banga kelesa, sulpat nipi sambar, sulpat si ngalah daging, sulpat si rance kula, sulpat si badat mata, sulpat si ngerepat nahe, sulpat si ngalunggang babah. Sai me utang, gancih ido, sai mara, kurumah tendi."
6. "Beliden sitik pagi burawan, itandangi ku uruk-uruk, erpantar-pantar, eranjap-anjap, erbertuk empat, erlambe sarsar, ercimpa rambe-rambe, ergule-gulen, e tuhalah mumbang, manuk mbulan. E, ergana gedang, erpersilih-silihi cur-cur, pola binerkat, galuh binerkat, beski tinampul silando ngawan, siang sirungkas, nungkasken banga kelesa, ertukuk-tukuk, ertambe-tambe, ertangkal, ermanuk piak. Icukupi ka peraleng tendi kurumah, nini begu deleng, naruhken tendi si enggo burawan; iogena mayang silayaren, ngelayari tendi si enggo burawan, iogena tualah mumbang surega, inehen-nehen tendi ku rumah, iogena galuh tingkel-tingkelen, ertingkel tendi i rumah ras anak dilaki, ras anak diberu enterem, ertingkel kinibayak, kinituah mbue; iogena cimpa lepat-lepaten, lepat tendi i rumah; ikan i kelayar nari, ngelayari tendi si enggo burawan; sira i keriahen nari, meriah ate tendi i rumah; iogena tinaruh manuk raja mulia, ermulia tendi i rumah; pia enggo runggu, lasuna pe runggu perunggu-runggu tendi i rumah ras anak dilaki, diberu enterem, ras anak beru senina enterem numpak-numpak kalimbubu mehuli; simata perunte-runten, gelarna kurungen manik, kurung tendi i rumah. E, ioge baka-baka, baka nasi, ngasiken anak dilaki ras diberu enterem, ngasiken kinibayak ras kinituah mbue; bakandu ertudung-tudungken uis arinteneng, teneng tendi i rumah, erbulung-bulungken benang teng, peteng bana tendi i rumah; beligai rudang-rudangndu, tande erbuah, simbera bayak, jaka ertuah ningen bayak; e gelarna rudangndu; cinta-cinta sarindapet, beras-beras, padang teguh, piso perenggi, penabah galuh, sada kupinta, kerina dapet, jaka mekeras ningen meteguh, gundari enda ku rumah tendi. Terang wari pepagi mukul tinaruh. E gelarna rudang-rudangndu; jabi-jabi rumindang, beringen tumbuh jadi uratna peterus pertibi, langgamenna sikunca benih, bulungna pe telumtum, buahna erdagul-dagul, ngembus pe angin i barat nari, i timur nari, i teba nari, i jawi nari, seh mbera ketartaren bulung, la mbera kedabuhen dango, la mbera lapat, la mbera giling, la mbera metembak, la mbera meriren, bage salindungen ku rumah. Maka iuweken; uwe me ningku, nindu, nina tendindu uwe kang, tendindu si tumpak tare, nare-nare anak dilaki diberu, ipetare-tare anak beru senina, itumpak-tumpak kalimbubu mehuli. Em tandingenna salindungen ku rumah, tanding-tandingen salindungen ku rumah bagi galuh sitabar ibas berneh-berneh, uratna pe man tepung tawar, laklakna pe man pengarkari, bulungna lape-lape tendi, buahna mecapet sitik mulana, meketket tingtang tengahna, reh tebuna pengenggoina, ikeleweti anakna indungna, bagi si la nai ketandan indungna ras anakna; em tandingenna salindungen kurumah man uwenken nina nini begu deleng. E, pukulen guru siwah tumba beras, utangna enem ringgit, dagangen sada, amak sada, nangtang uis sibas dagingna, man sinayona, man guruna. E sai me utangna, gancih idona; sai mara, ku rumah tendi."
7. "Beliden sitik pagi burawan, e mbun-mbun sangkep erpulung, persilih-silihi pe cur-cur, pola binerkat, galuh binerkat, beski tinampul silando ngawan, siang-siang sirungkas, tungkas banga kelesa. E, erpantar-pantar, eranjap-anjap, erbertuk empat, erlambe sarsar, ercimpa rambe, ergule-gulen, ertualah mumbang ka, ermanuk mbulan. E, ergana gedang, ergana galuh, ertenggiang begu, ergana ndulpak, ergana ndapndap, napsapken anak si ilat, ertukuk-tukuk, ertambe-tambe, ertangkal-tangkal, ermanuk piak-piak, ercibal rudang mehalep, ipasang bedil sepulusa kali. E, silekanna situmba sira ka man guruna, pukulenna berasna sepulusa, utangna sepuludua, dagangen sada, amak ka sada, mereken sinayo idas iteruh, sai utangna, gancih idona, sai mara, ku rumah tendi."
8. "Beliden sitik ka burawanna, e tandangi ku uruk meganjang, ipalu gendang, iembus sarune, ibuat gula pitu, ibereken amak pitu lambar, benang pitu sangkilen; e ergana enterem, ertenggiang begu, galuh erbuah, erndulpak nina, ergana ndapndap, ercimpa garun. E, bahan ka nge persilihi cur-cur, pola binerkat, galuh binerkat, beski tinampul silando ngawan, siang sirungkas, tungkas banga kelesa; ercibal rudang mehalep, erkejeren pitu sundut, utangna lima puluh kurang dua, sira empat tumba persilekanna, nangtang ka sinayo idas iteruh, dagangen pitu lambar. Em utang man guru, maka sai utang, gancih ido, sai mara, kurumah tendi, mulih nini begu deleng."

"E, enggo dung tenahku bibi." nina siberu Dayang

"E, daram-darami tabu gumbang, asakken aku kubas, maka lampas aku jumpa ras anakndu, si Raja Perkulcapi." nina ka siberu Dayang

E, asakken me iya ku bas. E, ombakken me ku tengah lawit. E, mombang-mombang me tabu gumbang, mombang ku kepultaken.

E, sangkut me iya i kerangen Raja Merare. Ngelar belat si Raja Bulan, dongkel-dongkel tabu gumbang. Ikuisken si Raja Bulan tabu gumbang. E, ndarat siberu Dayang. E, cirem si Raja Bulan. E, siarak-araken iya kurumah, iulihina amak dabuhenna.

Selesai. 

Lihat juga Si Rindu Tubuh Bagian I