Erta Terbuni

Ibas sada kuta lit me sada jabu si enggo mbalu. Anakna sekalak dilaki seh kal perkisatna. Dahinna dekahen medem. Rusur pe iajari nandena, tetap nge la diatena. Sekolah pe enggo ngadi.

 

Turangna mulih sekolah mis iya ku juma nampati nandena. Tutus atena erlajar.

Sada wari sakit nandena. Mekelek kal akapna. Berngi idilona anakna duwana. Emaka nina "Anakku duwana kam. Entah lanai gia ndekah umurku, sebab mekelek pinakitku. Kelenglah pagi atendu agindu e. Mesera pe siakap, lit nge marenda itadingken Bapandu emas. Ku tanem mbarenda ibas jumanta ah. Adi mate pagi aku cangkuli jumanta darami emas e. Juma e ula kal dayaken, sebab iya pagi ndatsa emas e, ula kataken kena man ise pe.

 

Tengah berngi mate nandena. Emaka kenca iya medak idahna nandena e, serko me ia duwana. Rehen kade-kadena. I apulina iya duwana.

 

Kenca piga-piga wari nandena ikuburken, ingetna kata nandena kerna emas i juma. Emaka nina man agina "Mulih kari kam sekolah baba nakan ku juma".

 

"Uwe...!" nina agina ngaloi.

Berkat me iya kujuma. Babana cangkul. "Sekali enda ku dat me emas e!" nina bas ukurna

 

I juma benakenna me nangkul. Arah suki kenjulu, la lit, asakna ku tengah, lenga jumpa, iteruskenna nangkul.

Enggo curcur panasna. Latih akapna, emaka ngadi iya, idahna agina enggo reh.

 

"Enta lau inemen ena, muas kal aku." nina

 

Ibereken agina, je nari isikapkenna nakan kakana, dung e lawes iya ku bernehen sapona.

 

Ibuatna bibit rimo. E maka siuanina si enggo icangkuli kakana.

 

Bagem teptep wari piah enggo dem jumana isuani agina rimo. Kakana ncangkuli kelang-kelang teran rimo.

 

"Uga gia emas e tentu ibas si lenga ku cangkul." nina ukurna

 

Enggo ndekah iya nangkul, emas lenga jumpa.

 

"Entah kurang mbages kuban." atena

 

Rulih-ulih enggo icangkulina, seh maka rimona enggo ermutik.

 

"Idahndu kang maka rimo e enggo ermutik Kaka?" nina agina nungkun

 

"Man kai rimo, emas sikataken nande mbarenda pe lenga ku dat, adi enggo ku dat, erkai nari aku ku juma?" nina kakana ngaloi

 

Dungna kenca tasak, e maka idayakenna rimo e. Melala datna senna. Meriah kal akapna.

 

"Adi emas atendu Kaka, tukurken emas, gelah datndu buni-buni nandenta ndube." nina agina