Bilang-Bilang

Maka io ari kute nu bilang-bilang nu buluh belangke
lako nitabah mama anak Karo-karo mergana ndube
ibabo taneh mekapal enda man tagan perkapuren
(De enggo jadi tagan)
tambahna tole man ingan nuri-nuriken pusuh rabut la tembena
(O silihku karina) kataku sea erndobah-ndobah
Entah bue gia labuhna, e man lantasenndu
la ne nge min terturi-turiken
buen naring (kidah) si man gelaren (turinna ate mesui)
O nande beru Tariganku
(Entah) nidarami kal pe jelma perliah (i babo taneh mekapal enda)
entah si la lit nge bagi ajang(ku) enda

Ape la bage ningku
enggo kidah ajang (mama si Karo enda)
bagi sumpamana kurmak sampe rapan bana
"Kutera ka kin nge turinna kurmak sampe rapan(na)",
nindu gia min. O nande bibiku karina. (Di turinna kurmak sampe rapan bana), de (reh) bage (galun) ni kenjulu nari,
tumulun kahe-kahe, tumul(u)n kolu-kolu, i je ndekahen si mayap-ayapna,
tarun mayap-ayap lupa (nantan) urat,
(i je) geluh erpala-pala, mate terbiar-biar
(I je makana) tading lepak pil(e)t
i j(e) kal nge ndia ndube penerang baban ku layo
maka bagenda serana, bage me nateku, O turang
i je piah ndabuh me iluhku erdemu-demu i bas isang
(I je) la ne (nge) ergulamit (man ukuranku, O turang)
I je me bage kuukuri kari bage karina
ngalah me la erdalin, latih me la erdahin
O nande beru Tariganku
Di latih erdahin e danci nge ningadiken, di ngalah-ngalah erdalin, e pe lit nge pengadinna.

O turang
di turinna latih la erdahin enda, ngalah la erdalin enda, i ja kal nge ngadinna
O turang bage me nateku
la ne nge (kidah) sembelah-sembelah man ukuranku
I je (makana) sekali bagi tabeh-tabeh nandangi belanga melas, e kal aku gia min ndube i bas perampu-ampun nande si mupus, sea la kal bo bagenda buenna man ukuran (turinna) ate mesui enda nateku.

O turang beru tiganku
maka la bage nindu sekali nari
dal(i)nna pusuh (kami turangndu kami) ermalem-malem sitik
"O mama Karo
ola i pejangjang turinna ate mesui
(di) turinna babanta geluh, ndube nge bekasta erjandi, (mulana) kita tembe jadi manusia
erkelang-kelangken nandenta si mupus
i je nge kita ndube erjandi erpadan si la danci niobari
e makana ola ate ceda ningku", (nindu, agiku turang kakana)
(Ba)gundari enda enggo mobah bicara
Bagundari enda enggo sambar bicara
dekah gempeni enggo i taneh urang gugung enda
e me gelah nituri-turiken nindu,
O turang nande bibiku karina
Enda me kuturi-turiken sitik
kita ngaloken aturan
si la tersimbak enda,
De ndube bapanta si ngeraje taneh urang gugung enda nge iakapna pantas
(bahan) ngalo (ia) la rido
bahan urang putih
bahan ukurna la lit tole
(Ipande-andena me ndube) bapanta si meherga sora
I je la ne me cakap si sungsangen
(i je er pejua ka ndube) sada nari anak Perangin-angin mergana, si ngiani taneh Batukarang,
tewas ka ia ndube
bahan enggo erdemu taki si kancang-kancang
(I je nari me ndube jadikenca) taneh enda sitik naring
(bahan) enggo belidan dalin pengkulih nganca perpola
E me i bahan ngalo la rido ndube
(bagundari) nggalar(me) la rutang
I je karina me kita rate mesui
seh ku diberu balu-balu
I ja (kal nge) tading lepak(na) (ningku)
entah enda meburuk nageri
Enggo me kita melawenca tubuh
kita ibas pusingan ate mesui enda, (agi)

Ape la bage ningku
entah nandangi nageri Acih ndade gia ibabena, i simbak la ne banci
I je kal me si la ne ergulamit ningku, bibiku.