Bilang-Bilang

Maka io ari kute bilang-bilang nu buluh
si mula tubuh ni teruh langit meganjang
ni babo taneh mekapal
si lebe ertubis maka erbuku
si lebe erbuku maka erngawan
si lebe erngawan maka erlawak
si lebe erkuncir maka erbulung

Ni je di nitabah me gia buluh enda
man ingan nuri-nuriken pengindo la mehuli nateku
ningen man tabung timbako nateku
maka nipeoge-oge nateku, o kaka
maka saber sitik ate mesui nateku, o kaka

Ni ja pa dah kam la bage ningku
enggo ka kuidah ajang mama Karo
bagi sumpamana kaba-kaba si runtik
ingan kabang maka melambas,
ingan cinep pekurang bana
sumpamana kaba-kaba si runtik
di mabasa mama si Karo

Tambahna tole enggo kuidah ajangku
bagi sumpamana ketak-ketak Layo Bampu
belinna ni Layo Biang
metuana ni Layo Bampu
belangsa pengayan-ayanen
lupa erban ingan.

Iana me ajang mama Karo bere Biringna enda.
di turinken utang judi kupasang
daminna ate mesui si banci nicariken nateku.

Jine lampas ka jengkas tading melumang
melumang sea mangkar, ernande erbapa lahang
tambahna tole anakberuku, seninaku pe enggo muang karina
maka mambur me gia perdalin
nandangi taneh kerangen mbelang
inganna bage naring kenca danci
maka ernandeken si jaluk erlayam
erbapaken si erkata tida
di suruhna pagi aku erdakan
la kuangka katana

Ni jenda ambur me si bage iluh
ma ola kal atendu ceda, agi
kuturinken pengindonta la mehuli, o agi
dukur nipi te si rajaguwala ma kaliaga
ndube nipindo bagenduari nibaba ho