Si Laga Man

Maka sekali lit sada bapa. Tubuh anakna, tapi mate rusur. Jadi anakna sada, igelarina si Laga Man, maka pet ia man nina.

I ukatna nakan sinokkat, mintes keri.
"Enggo nggeluh anakta enda!" nina man ndeharana

Pepagina i ukatna dua nokat, e pe langnga besur, enggo keri. Maka enggo keri empat nokat, sigantang, situmba, dua tumba, empat tumba, sinalih (sepuluh tumba), langnga besur si Laga Man.
"Lanai terasuhi anakta enda kuakap, enggo keri nakan sinalih!" nina bapana

I sulang sekali, ipantem sekali babi, i bereken, sisa ia manca iberekenna. E pe keri, ras babi ras nakan, lanai kenan bapana.

"Bage gia, gelah lampas mbelin anakku e." ate bapana

Gelgel ibuatna sekali nari lembu, raskenna kerina ia ras seninana motongsa lembu ndai. Kenca enggo tasak, dilona anakna, iberekenna panna bengkau ndai, keri kerina bengkau ras nakan. Lanai kenan bapa ras nandena.

"Lanai terasuhita anakta e, asakai terbuat kita, keri ipanna." nina bapana

Bas sada wari lawes ia duana ras anakna ku kerangen.

"Ije ko kundul, ingani kampilta e, ola bene, ola ko lawes-lawes." nina bapana man si Laga Man

Itabah bapana me kayu buah, iusur-usurna, tapi langnga mbulak.

"Ota ku rumah nakku! Enggo ben wari." nina man anakna

Berkat me ia duana ku rumah, kenca seh i rumah, mis man. Man si Laga Man, e maka medem.

Arih-arih me ia ras tukur emasna.

"Ndai ku tabah kayu buah si galangna, langnga ndai mbulak, untungna langnga mate, pepagi retap kayu buah ndai ku tabah, si bunuh anakta enda ndai. Uga akapndu?" nina bapa si Laga Man

"Labo dalih!" nina ndeharana

"Pepagi lampas dage kam erdakan." nina bapa si Laga Man

"Uwe!" nina ndeharana

Pepagina kenca elah man.

"Ota tempi kampilta e, gelah berkat kita nabah kayu buah ndai man ranting." nina bapana man si Laga Man

Kenca enggo seh ia i kerangen inganna si nderbih.

"I je ko kundul ngiani kampilta e, ola ko lawes, ola ko mbiar, i das uruk e nge aku." nina bapana

"Kai pe labo aku mbiar bapa!" nina si Laga Man

"Bage me dage, ndo ku usur-usur nabah kayu ndai." nina bapana

Ben me matawari, mbulak kayu, enggo i dumpangna si Laga Man, manai ia teridah.

"Enggo me mate si Laga Man. Enggo mate anakku e ras seninana ndube." nate bapana

Lawes ia ku rumah.

"Enggo mate anakta ndai. Legi manuk kuteruh, geleh empat ah!" nina man ndeharana

E maka i legina manuk ndai.

"Enda manuk ndai!" nina ndeharana

I elbuhna silihna arah jabu kenjahe.

"Kai silih?" nina silihma

"Geleh manuk enda, enggo mate permenndu si Laga Man." nina man silihna

"Uwe!" nina silihna janahna nggelehi manuk ndai kerina

Enggo kenca tasak manuk ndai, man ia kerina ras silihna ras turangna. Idabuhken turangna nakan sempukul ras bengkau manuk ku teruh karang.

Enggo kerina elah man.

"Ngisapken silih! Kuga kin banci bahanndu pengindonta silihku?" nina bengkila si Laga Man

"Ngisap ia. Ndo kampilndu ndai silih!" nina bapa si Laga Man

Relbuh i teruh nari.

"O... Bapa!" nina

"Kai nge ndia silih?" nina bapana

"Bagi sora si Laga Man kuakap." nina silihna

"O... Bapa! I ja ku cibalken ranting enda ndai?" nina si Laga Man nungkun

Tersengget bapana, ibukana pintun, iidahna enggo rongga kerina ibas kesain.

Ampekenna kayu ndai ibas turena, ture pe runtuh.

"Kuga lah e nake? Enggo ibabana kayu ndai kerina, ture ah pe enggo runtuh. Mate ningen, labo kepe mate! Nateku ndai mate ia. Kuga denga lah ninta taresa?" nina bapana

"Ula mbiar silih. Aku gia ndilosa ku rumah." nina bengkila si Laga Man

"Enggo babako kerina ku rumah ranting ndai, ture pe runtuh! Arah batang kayu enda ko kudas. Maka ko man!" nina bengkilana

Bapana enggo mbiar. Ikatakenna kerina anak kuta nastasi dahan-dahan kayu. Itastasina kerina jadi ranting.

"Buatlah kerbo sada gelah bere man ia, anakku! Rasken kerina, nasak bengkona, ennggo akapna latih, ibabana rantingta kerina, gelah e si bere man." nina bapana man anak kuta

Enggo tasak, iatur kerina, idilo si Laga Man man.

"Manken nakku, enggo kam latih." nina bapana

Keri sada kerbo ipanna, ras bengkau kerina, ras nakan. Lanai kenan sada pe.

Ibereken bapana amak.

"To medemken ku jamburta!" nina bapana

Lawes ia. Tunduh si Laga Man.

Arih-arih bapana ras silihna, ras ginemgemna kerina.

"Kuga lah perbanta ndia, arih-arih kita kerina." nina ginemgemna

"Mesera me siakap kerina rukur, bage galangna kayu si itabah kam ndai ndumpangsa, ibabana ku rumah, e maka ku akap susah rukur." nina ka sekalak

"Lit kap sada deleng batu galang, tenahken sekali nari ia i berneh. Silih mabaisa ku berneh, kita engkuraksa kerina idas." nina bapana

Baba bengkilana si Laga Man ku berneh. Maka erdalin ia ras bengkilana, teguna sada kambing. Seh i berneh, itambatkenna kambing ndai.

"Iyani kambingta enda, aku muat rudang kapias, ola tadingken kam, ola kari ipan arimo." nina bengkilana

"Lang! La kutadingken. Di langnga kam reh, labo kutadingken." nina si Laga Man

Maka seh idas deleng bengkilana, iraskenna ngkuraksa kerina, ras ginemgem, sada kuta kerina. Enggo me sitengah batu idah ikurak, emaka iongkilna.

Melawen akapna reh bengkilana, i elbuh si Laga Man me bengkilana.

"Bengkila! Bengkila!"

"Kotip ongkil! Lit sorana i berneh." nina bengkila

E maka ikotipna kerina, minter erdelang batu si ndai. E maka idumpangna si Laga Man. Pelnat!

Ku rumah ia kerina.

"Latih siakap kerina. Buat sada lembu, bahan bengkauta." nina bapa si Laga Man

Maka ibuatna, ipantemna, deba erdakan, deba motongsa. E maka tasak kerina, minter man kerina.

"Ateku min enggo mate si Laga Man i dumpang batu ndai, meganjang kal idas deleng nari. Latih siakap kerina." nina bapana

Enggo man, ngisap kerina, lawes kurumah, sidahi rumahna ia. Sitik nari enggo ben.

Maka danak-danak medem, sintua-sintua ercakap denga kerina. E maka ercakap ia kerina.

Reh si Laga Man. Maka ibabana batu si galang ndai, ijujungna.

"O... Bapa! Ija kubahan batu enda ndai?" nina si Laga Man

"Ijem." nina bapana

E maka ibenterkenna ibas tengah kesain. Enggo kena sada sapo i tindih batu simbelin. Enggo mehuli batu ndai man perkundul-kundulen jelma kerina.

E maka mbiar bapana ras bengkilana i rumah, idahna batu ndai enggo i baba si Laga Man ku rumah.

"Kuga perarihta ndilosa kurumah e silih?" nina bapana

"Ula nai mbiar, adi mbiar kita tentu ibunuhna kita, batu si galang ndai ibabana!" nina silihna

E maka lanai mbiar bapana.

Lawes iya ku teruh ndilo si Laga Man, tapi minter ngerana si Laga Man.

"Iyani kambing ndai ibas berneh, muat rudang aku, nina bengkila. Tapi ngkurak batu si galang ndai idas uruk, munuh aku ate kena kerina, ras bengkila, bapa, bibi, ras nande. Di munuh aku nate, ma bage, arih-arih lah kita kerina, ras bapa, ras nande, ras bengkila, ras turangku kerina. Buatlah man bangku bunga-bunga pitu lambar, nande. Utang bibi cimpa pitu (7) mpukul, bengkila rutang bulang-bulang ras kampil silambar, bapa rutang sada piso, mama pementing sada." nina si Laga Man

E maka iberekenna kerina.

"Ma di go bage, bapangku, nande, bengkila, bibì kerina, ena kam turangku kerina sayep-sayep, mela kal ukurndu kerina ngenehen aku, gelah aku lawes, ola ersayep, ras kita gia ate, di nakan si ben la nai terbuat. Di bage, bage me kam kerina, endam aku berkat, ola aku erbangger-bangger." bage me nina si Laga Man

Maka itepukna me batu si galang ndai. Lawes iya.

Maka lawes iya niar-niar ibas tengah kerangen rimbun raya.

E maka jumpa iya ras si Pengeltep si mate begu.

"Ise e?" nina si Pengeltep

"Aku!" nina si Laga Man

"Sendah jumpa jukut raja." nina si Pengeltep

"E toton maka jelma erniar-niar pe." nina si Laga Man

E, ieltep si Pengeltep si Laga Man.

"Buang sial! Man kai ieltepen aku, kena pe labo ipanna." nina si Laga Man

"E maka ula kam niar-niar i tengah kerangen si rimbun e. Kai biarku!" nina si Pengeltep

"Tuku la ko mbiar?" nina si Laga Man

"Tuhu!" nina si Pengeltep

E maka iayaki si Laga Man, tipakna mestak itengali awang-awang si Pengeltep! E maka ndabuh, seh iteruh minter nge terketes.

I buat si Laga Man bunga-bunga ndube sitik, cimpa sincircir, enda i tamana i babah si Pengeltep. Minter iya nggeluh.

"Nembah aku bandu, ola aku i bunuh kam, siembah-embah kampilndu aku gia." nina si Pengeltep

"Em katangku ndai, mintes ko merawa ngenehen aku, bujur katangku man bam." nina si Laga Man

E maka ras iya erdalin, itempi si Pengertep kampil si Laga Man. Ras iya duana niar-niar kerangen rimbun raya e.

Maka jumpa ia ras si Pengerintak Buluh Sungsang.

"Ku ja nge kena niar-niar e?" nina si Buluh Sungsang

"La larangen jelma ibas kerangen rimbun raya." nina si Laga Man

"Kai maka lang nindu?" nina Buluh Sungsang

"Ma lit si ngataken bage kidekah aku niar-niar ibas kerangen rimbun raya." nina si Laga Man

"Aku pe mbelin-mbelin ibas tengah kerangen enda, ma lit jelma di jumpa bage cakapna."nina si Buluh Sungsang

"Radu jumpa me kita sendah, di la kam mate, aku mate, sendah meriah me!" nina Laga Man

Maka irintak Buluh Sungsang sada buluh si mbur, seh pe meruah ras taneh terus ku uratna. E maka itutukenna si Laga Man.

Nuruk si Laga Man arah teruh. E maka itipak si Laga Man minter si Buluh Sungsang. Maka tangis me si Buluh Sungsang.

"Enam katangku ndai menai kita arih-arih, mintes kam merawa." nina si Laga Man

"Adi bage nembah aku, tangtang dage nahengku e." nina Buluh Sungsang

I tangtangi si Pengeltep si Buluh Sungsang.

"Enta dage piso e!" nina Buluh Sungsang

E maka ibereken si Laga Man. Itakilna buluh ndai, maka iinemna me launa.

Kenca bage, ibere si Laga Man ngisap Buluh Sungsang. Ngisap ia teluna. Enggo ras ngisap janah ertutur me ia.

"Ja nari kam?" nina si Buluh Sungsang

"Aku erdalin-dalin perban ibunuh nande-bapangku atena aku, rikut ras turangku kerina. E maka aku erdalin-dalin." nina si Laga Man

"Ise dage gelarndu teman?" nina si Buluh Sungsang

"Gelarku si Laga Man." nina si Laga Man

"Temanndu e? Ersenina kam duana?" nina ka si Bulung Sungsang

"Lahang!" nina si Laga Man

"Dage ise gelarna?" nina si Buluh Sungsang

"si Pengeltep Begu." nina si Laga Man

"Adi bage ola nai kita rubat teluna, kam bapa kami duana." nina si Buluh Sungsang

Kenca bage lawes ka ia erdalin teluna, ibentasina me pitu lapis deleng, ibas deleng peenemken ngadi ia ngisap teluna. Janah kenca seh iya i datas deleng si pepituken e, i idahna me i datas nari sada kuta, nusur iya ku kuta e, janah idahna me jelma perdagang lada.

Kenca bage, ku sapo kalak me ia teluna, janah sapo si dahina e eme sapo pengulu dagang. Ibereken kalak e me pengulu ndai ngisap. Ibereken pengulu ka me isapna man kalak e ndai.

"Aku kuteruh kentisik." nina Pengulu janahna nusur ku teruh niar-niar ginemgemna, kerina lit lima puluh kalak. Janah ikataken Pengulu e me man kerina ginemgemna gelah pulung.

Emaka arih-arih iya kerina ije, janah ngerana me pengulu ndai man ginemgengna.

"Lit jelma telu kalak ku sapo dagangta enda, perbahan kerehen kalak si telu e, erbahan mbiar kalak ku bas sapota e." nina Pengulu

"Ise saja kalak si telu e? Gelah si pan." nina Ginemgem man Pengulu

"Bage!" nina Pengulu ngaloi

Kenca bage, maka nggarut piso me iya kerina.

Kenca enggo dung iya kerina nggarut, maka lawes me iya kerina ku sapo.

Maka seh kenca iya i sapo, ilebuh Pengulu ndai me kalak ndai teluna.

"Ku teruh kam teluna silih, gelah ngisap kita." nina Pengulu

"Banci." nina Si Laga Man

Idah si Laga Man enggo mbentar kerina piso. Maka ibuat si Laga Man sempukul cimpa ras bunga-bung, maka icidurina, iputarina temanna ras ia.

Nusur iya, iberekenna pengulu ngisap, mintes itakil Ginemgem si Laga Man ras temanna. Seh ngasa ciger wari lalap kalak ndai teluna lenga mate, sebab ma telap piso kalak e. Perbahan enggo latih iakapna nakil si Laga Man ras temanna, tapi lalap la mate, kiam me dungna Pengulu ras Ginemgemena.

Sanga kalak e kian, iayaki Laga Man me iya kerina, janah itundukna rikut ras ibunuhna me Pengulu e.

Mbiar me kerina Ginemgem e nandangi Laga Man. Tapi ibas sie ngerana me si Laga Man man bana kerina. Tapi ibas sie ngerana me si Laga Man man bana kerina.

"O teman kerina, enggo puas atendu kerina nakili kami pagi-pagi nari ngasa ben wari. Gia bage labo kam ibunuh kami, sebab ieteh kami kap, maka ibunuhndu pe atendu kami teluna perbahan kata Pengulu Dagang nge. Perbahan Pengulu Dagang enggo mate, maka kam labo ibunuh kami, ola kam mbiar."

"Nembah kami kerina, ola kami ibunuh." nina Ginemgem

"Lahang." nina Laga Man

E maka ibereken Ginemgem ndai kampilna man si Laga Man ras Temanna. Ialoken Laga Man kampil ndai, janah ngisap me ia. Ginemgem deba muat tebu, kulitina janah iberekenna man si Laga Man. Ipan si Laga Man ras temanna tebu ndai, janah kenca enggo keri tebu ndai, "Ku datas kita." nina Laga Man

Janah ku sapo me kalak ndai kerina, deba ia erdakan, deba nggeleh manuk. Janah enggo kenca tasak kerina, dilona si Laga Man ras temanna. Radu ras me iya kerina man.

Perbahan enggo gelap wari, maka dung kenca ia kerina man, maka minter me ia medem. Janah terang wari, arih-arih ka ia kerina.

Ndarat si Laga Man, janah ngerana ia, "Ku juma saja kena kerina, barang-barang la banci bene." nina man Ginemgem

E maka ku juma kerina Ginemgem ndai ngukati lada. Si Laga Man i sapo tadin.

Janah piah tande sada bulan dekahna, mengelngel me niakap si Laga Man dungna. Tapi adi lawes ningen, mbiar ka ia bene barang-barang si lit ibas sapo e.

Perbahan bage, arih-arih ka me ia dungna ras temanna si dua kalak ndai. Janah ibas ia arih-arih e, sue me arihna segelah erbahan sekalak si tading i sapo jadi Pengulu Dagan.

Gia enggo me ibahanna kerin guna jadi pengulu dagang si ngiani sapo, tapi tetap kang la tertahan si Laga Man ras temanna tading i kuta e. Janah ibas sada wari ngerana ka me ia mulihi man kerina Ginemgem.

"Ma tertahan kami kundul-kundul ijenda, lawes lah kami, janah ibas sada wari pagi reh ka kami." nina teluna man kerina Ginemgem

"Enggo ku suan sinuan-sinuan enda i duru saponta. Adi melus pagi, bangger me ia atenndu, janah lawes kam dua entah pe telu kalak ndai aku." nina Laga Man

E maka lawes me iya teluna erdalin kempak matawari ben. Setengah wari erdalin jumpa iya sada kuta. I idahna enggo melenget kal kesain kuta e. Janah nungkir ibas benteng nari sekalak diberu.

"Ola kam erdalin-dalin ibas kesain! Ija nari kin kam ndai?" nina Diberu e

"Ajangku lanai ernentu bibi." nina Laga Man

"Adi lanai ernentu, di mesikel kam ijenda, banci. Tapi ola kam erdalin-dalin ibas kesain e, lit merawa manuk sigurda-gurdi." nina Diberu e

"Labo aku mbiar bibi, mate me totonku, tapi lalaq la mbera pengindonku." nina Laga Man

"La pe mbera pengindonku nindu, mbue kalak mate ibas kuta enda, enggo keri ipan manuk sigurda-gurdi. Ma idah kam enggo melungen kuta enda." nina Diberu e

"E pe labo aku mbiar." nina Laga Man

"Adi terbunuhndu kin manuk sigurda-gurdi, maka enggo salih kam jadi raja ibas kuta enda, sebab enggo ikeriken manuk sigurda-gurdi turang kami." nina ka Diberu e

"Banci ku bunuh." nina Laga Man

"Mari kubas dage kam. Talangi pintun enda, ola melawen, reh kari iya idahna kita, mate kita." nina Diberu e

"E banci kami kubas." nina Laga Man

Italangina pintun e, kenca kubas ia teluna, itutupina ka pintun e. Seh kenca iya ibas, ercakap iya kerina, lit iya pitu kalak buena.

"Uga belinna manuk sigurda-gurdi e bibi?" nina Laga Man

"E, mbelin mama! Lit belang kabengna sedepa sembelah, em belinna." nina Diberu e

"E kin ngenca si engkeriken jelma ibas kuta enda?" nina Laga Man nungkun

"Owe mama!" nina Diberu e

Ben kenca wari i asah si Laga Man pe pedangna si belangna asa bulung galuh, e maka i turapna pedang e alu cimpa ndube. Janah itadingkenna Buluh Sungsang ras Pengeltep ibas keben ras Diberu ndai, ndarat Laga Man nimai sigurda-gurdi ibas kesain. Janah idahna sirang dua puluh depa nari kap sigurda-gurdi ndai.

"E manuk ndai." ate Laga man, janah irintakna pisona, emaka ikesahina jekjek ibas kesain.

Itangkis manuk sigurda-gurdi piso Laga Man, janah sada nari kabeng manuk e enggo namburi Laga Man, janah ikeskes sigurda-gurdi me Laga Man ibas kabengna e.

"Enggo melus kuning pengulunta, sendah kita erdalin kempak matawari ben." nina Pengulu Dagang si tama Laga Man ndube

Enggo kenca iya jumpa, idahna nahe si Laga Man, nahena genca teridah, sebab dagingna itamburi kabeng sigurda-gurdi. Maka irintakna ibas perpadanen si Laga Man, iembusna igungna, e maka mulihi ka iya nggeluh, janah manuk sigurda-gurdi ndai enggo mate.

Ercakap si Laga Man ras Pengulu Dagang. Janah lawes me iya ku keben diberu, janah arih-arih me iya ije kerina.

"Sada e ngenca gelgel engkeriken jelma?" nina Laga Man nungkuni

"Owe mama." nina Diberu e

"Lanai kita mbiar erdalin ibas kesain." nina Laga Man janahna lawes erdalin-dalin

Isiar-siarna kerina kuta e, janah barang simeherga ipepulungna.

Kenca ben wari ngerana me si Laga Man. "Lanai lit jelma ibas kesain enda, ngena atendu aku? Segelah man bangku kam." nina man Diberu e.

"Ngena." nina Diberu e

Emaka iempoina Diberu e. Sada man Laga Man, sada man Pengeltep, sada man Buluh Sungsang. Emaka isahken si Laga Man jadi anak beruna si Buluh Sungsang, janah Pengeltep jadi anak beru Pengulu Dagang.

Maka lawes me Pengulu Dagang ras anak beruna. Erdalin iya, janah kenca seh i dagang, nungkun Ginemgem man bana.

"Uga berita pengulunta si Laga Man?" nina nungkun man Pengulu Dagang

"Enggo dat kami iya, janah labo iya mate, sebab enggo iembus kami igungna salu embus-embus perpadanen." nina Pengulu njababsa

"Merandal adi payo kin la iya mate, gia enggo melus bulung kuning ndube, kuakap kin pe enggo mate, sebab melawen kuidah kam reh." nina Ginemgem

"Kami melawen reh perbahan ercakap-cakap kami." nina Pengulu

"Kai cakap kena?" nina Ginemgem

"Cakap empo." nina Pengulu

"Ise man bana?" nina Ginemgem nungkun

"Enda me kap, enggo baba kami dua kalak, Pengeltep ras ndeharana. Ijah tading dua kalak nari man si Laga Man ras Buluh Sungsang." nina Pengulu e