Maba belo selambar, e me kap upacara adat Karo “nungkun diberu” si enggo ertentu jelmana. Acara pokok ibas maba belo selambar “nungkun kata kalimbubu,” e me kap kerna kesenangan ukur anak ipupusna si diberu erjabu ras nungkuni. Adi si man sungken e la beru si ngumban (permen nande) entah e beru puhun (impal erkiteken bapa), maka semalna enggo lit arih-arih si dilaki ras si diberu maka atena erjabu duana. Ranan entah pe arih e enggo ikut je orang tua entah pe anak beruna maka iban “maba belo selembar”. Enca lit arih enda, maka pihak si dilaki ras si diberu ngataken sangkep nggeluh na pelepar, gelah reh tupung wari si enggo i tentukan lako runggu kerna maba belo selambar. Sangkep nggeluh aras si empo (sidilaki) e me kap: simupus, sembuyak, senina siparibanen, senina sepemeren, senina sepengalon. Anak beru cekuh baka, anak beru ipupus, anak beru angkip, anak beru sepemeren, anak beru menteri. Kalimbubu si ngalo ulu emas, kalimbubu simada dareh, kalimbubu i perdemui ras kalimbubu sepemeren, bage pe puang kalimbubu ( singalo perkempuan).
Sangkep enggeluh arah si sereh e me kap: simupus, sembuyak (seri mergana) senina sepemeren, seri siparibanen, senina sepengalon. Kalimbubu singalo bere-bere, kalimbubu siperdemui, kalimbubu si mada dereh, kalimbubu si ngalo perninin, kalimbubu singalo perkempuan. Anak beru tua, anak beru cekuh baka, anak beru ipupus, anak beru iampu dan anak beru menteri, anak beru simajeken lape-lape.
Maba belo selambar iban i rumah diberu (sereh). Enggo kenca pulung kerina sangkep nggeluh si empo ras si nereh, maka i pepulungna anak beruna pekepar. Si man pesikapen i je e me kap: kampil pengarihi/kampil pengorati, penindih pudun, uis arinteneng, pudun, ras penindih Rp.11.000,-
Pesikapna amak mbentar datasna tamana amak beru-beru man inganna kundul, petala-tala banna inganna kundul. E maka ilebuhna nina “Mari kerina kam anak beru kami reh kam kuamak enda, gelah benaken ndu runggunta,” begendam nina ngerana pekepar.” E maka reh me ku ingan si enggo tentuken. Enca kundul pekepar e maka ertutur me si runggu e. Enca ertutur e maka cakapken me kerna gantang tumba ras si debanna sini akap perlu.
0 Comments